ÌìÌì³Ô¹Ï

Mae hwn yn gwrs byr dysgu cyfunol lefel 7 mewn Presgripsiynu Annibynnol, ac mae’n agored i nyrsys cofrestredig, bydwragedd, ffisiotherapyddion a pharafeddygon. 

Os oes gennych ddiddordeb yn y cwrs Presgripsiynu Annibynnol Lefel 6, cliciwch yma: Presgripsiynu Annibynnol (NHS-3212). 

Bydd y cwrs yn dechrau ar 18 Medi, 2025.

Bydd agweddau o’r addysgu yn cael eu cyflwyno ar y cyd â’r cwrs Presgripsiynu i Fferyllwyr. Mae natur aml-broffesiynol y cwrs byr hwn yn rhoi cyfle gwerthfawr i weithwyr proffesiynol profiadol rannu eu gwybodaeth a'u sgiliau a datblygu gwahanol safbwyntiau ar arfer presgripsiynu. Bydd dysgu rhyngbroffesiynol yn annog ymagwedd gydweithredol tuag at ddysgu a gweithio sy'n canolbwyntio ar dîm. Yn seiliedig ar hyn, bydd disgwyl i chi chwarae rhan weithredol mewn dysgu rhyngbroffesiynol yn ystod y rhaglen trwy rannu eich arbenigedd a'ch safbwynt proffesiynol. 

Bydd y cwrs yn sicrhau eich bod yn gyfarwydd ag egwyddorion cyffredinol arfer presgripsiynu y mae'n rhaid i chi eu defnyddio yn eich maes arbenigedd clinigol eich hun, a’ch bod yn gallu eu defnyddio yn eich gwaith. Bydd testunau'n cael eu cyflwyno mewn arddull generig a bydd y siaradwyr yn cyfeirio at eu profiad clinigol eu hunain i ddarparu enghreifftiau clinigol, fodd bynnag gellir cymhwyso'r egwyddorion a drafodir i bob maes ymarfer. Bydd y cwrs yn eich galluogi i ehangu ar eich gwybodaeth bresennol a chymhwyso'r rhain i egwyddorion presgripsiynu. Bydd hyn yn darparu sylfaen gref ar gyfer eich datblygiad fel presgripsiynydd annibynnol/atodol newydd gymhwyso. 

I bwy mae’r cwrs hwn yn addas?

Mae'r cwrs byr presgripsiynu lefel 7 hwn wedi'i anelu at nyrsys cofrestredig, bydwragedd, ffisiotherapyddion a pharafeddygon sydd â thystiolaeth ddiweddar o astudiaeth academaidd lefel 7, ac sy'n dymuno dod yn brescripsiynwyr annibynnol.  

Mae'r cwrs byr hwn yn addas ar gyfer gweithwyr gofal iechyd proffesiynol sy’n cydnabod y byddai cymhwyso fel presgripsiynydd annibynnol o fudd i ofal cleifion. 

Pam astudio’r cwrs?

Bydd y cwrs byr heriol ond gwerth chweil hwn yn galluogi dealltwriaeth o gyfrifoldebau clinigol, cyfreithiol a moesegol presgripsiynwyr annibynnol.  

Bydd y wybodaeth a’r sgiliau a ddysgir ar y cwrs yn eich grymuso i fabwysiadu dull o bresgripsiynu sy’n canolbwyntio ar yr unigolyn o fewn eich cwmpas ymarfer a nodwyd. 

Trwy ddysgu gyda, a chan, weithwyr gofal iechyd proffesiynol eraill megis nyrsys, bydwragedd, ffisiotherapyddion, parafeddygon a fferyllwyr, byddwch yn cael eich grymuso i hwyluso ymagwedd aml-broffesiynol at arfer presgripsiynu er mwyn gwella gofal cleifion. 

Pa mor hir mae'n ei gymryd i gwblhau'r cwrs hwn?

Mae'r cwrs rhan-amser hwn yn ymestyn dros 7 mis. 

Bydd y dysgu yn cael ei gyflwyno bob dydd Iau ar ein campws ym Mangor rhwng Medi 2025 a Mawrth 2026. 

• Medi 18fed, 25ain
• Hydref 2il, 9fed (o bell), 16eg
• Tachwedd 6ed, 20fed, 27ain
• Rhagfyr 11eg
• Ionawr 16eg
• Chwefror 12fed 
• Mawrth 5ed

Bydd 11 wythnos pellach o astudio hunan-gyfeiriedig er mwyn paratoi ar gyfer aseiniadau.

Bydd yr aseiniad terfynol yn cael ei gyflwyno ym mis Ebrill 2026. 

Mae hefyd yn ofynnol i fyfyrwyr gwblhau o leiaf 90 awr mewn ymarfer clinigol dan oruchwyliaeth Ymarferydd Presgripsiynu Dynodedig (DPP). 

Noder y gallai’r uchod newid o ganlyniad i’r broses ail ddilysu. 

Tiwtor

Ffion Simcox 

Ffion yw arweinydd y cyrsiau presgripsiynu ym Mhrifysgol Bangor, yn ogystal ag arweinydd yr MSc mewn Ymarfer Clinigol Uwch. 

Mae Ffion hefyd yn ddirprwy gadeirydd o Rhwydwaith Addysgwyr Ymarfer Uwch Cymru (WAPEN). 

Cymhwysodd Ffion fel nyrs gofrestredig yn 1996 ac fel presgripsiynydd annibynnol yn 2011. Cwblhaodd ei MSc mewn Ymarfer Clinigol Uwch yn 2012 a gweithiodd fel ACP mewn meddygaeth acíwt am 6 mlynedd cyn ymuno â'r Brifysgol. 

Beth fyddwch chi’n ei astudio ar y cwrs yma?

Mae’r cwrs byr heriol, ond gwerth chweil hwn wedi ei seilio ar y  Royal Pharmaceutical Society's A Competency Framework for all Prescribers (2021) er mwyn eich paratoi i ddod yn bresgripsiynydd annibynnol cymwys a hyderus. 

Beth fydd y dysgwr yn ei gael allan o’r cwrs?

Cewch eich addysgu gan bersgripsiynwyr annibynnol a meddygol profiadol o wahanol gefndiroedd proffesiynol. Cefnogir yr addysgu gan glinigwyr arbenigol i sicrhau bod y cynnwys yn berthnasol ac yn cyd-fynd a ymarfer clinigol. 

Erbyn diwedd y cwrs, bydd dysgwyr yn gallu gwerthfawrogi, deall ac arddangos y wybodaeth a’r sgiliau sydd eu hangen i ddod yn bresgripsiynydd annibynnol, diogel ac effeithiol, gyda phwyslais ar ofal unigol, fel yr amlinellir yn gan y Royal Pharmaceutical Society. 

Ar ôl cwblhau'r cwrs byr hwn yn llwyddiannus, bydd myfyrwyr yn gallu cofrestru eu statws presgripsiynu annibynnol/atodol gyda'u corff rheoleiddio. 

Mae'r cyllid ar gyfer y cwrs presgripsiynu i weithwyr GIG yn cael ei weinyddu ar ran Llywodraeth Cymru (HEIW) gan Fwrdd Iechyd Prifysgol Betsi Cadwaladr (BIPBC). Rhaid i chi wneud cais am gyllid gan BIPBC os ydych chi:

• yn gweithio o fewn BIPBC
• yn gweithio mewn meddygfa dan reolaeth BIPBC
• yn gweithio mewn meddygfa annibynnol yng Ngogledd Cymru
• I wneud cais, cysylltwch â: BCU.EducationACP@wales.nhs.uk

Rhaid i bob ymgeisydd arall drefnu cyllid amgen.

Ymarferwyr sydd wedi cofrestru gyda’r Cyngor Nyrsio a Bydwreigiaeth (NMC): 

Nyrs, bydwraig, neu nyrs iechyd cyhoeddus cymunedol arbenigol cofrestredig. 

Wedi cofrestru gyda'r Cyngor Nyrsio a Bydwreigiaeth ers o leiaf blwyddyn cyn gwneud cais.

Bydd angen nodi enw Asesydd Ymarfer a Goruchwyliwr Ymarfer addas i gyflawni rolau'r Ymarferydd Presgripsiynu Dynodedig (DPP) wrth gyflwyno’r cais. 

Wedi cofrestru gyda’r Cyngor Proffesiynau Iechyd a Gofal (HCPC): 

• Wedi cofrestru gyda'r Cyngor Proffesiynau Iechyd a Gofal ac yn meddu ar o leiaf 3 blynedd o brofiad ôl-gymhwyso yn y maes clinigol yr ydych yn bwriadu rhoi presgripsiynau ynddo.
• Ymarfer mewn amgylchedd lle mae angen defnyddio presgripsiynu annibynnol neu bresgripsiynu atodol yn rheolaidd 
• Yn meddu ar gymhwyster mewn ymarfer uwch neu'n gweithio ar lefel gyfatebol. 
• Gallu dangos sut rydych yn adfyfyrio ar eich perfformiad eich hun ac yn cymryd cyfrifoldeb am eich datblygiad proffesiynol parhaus eich hun gan gynnwys datblygu rhwydweithiau ar gyfer cefnogaeth, adfyfyrio a dysgu. 
• Wedi nodi datblygiad proffesiynol parhaus addas. 
• Bydd angen nodi enw’r Addysgwr Ymarfer a fydd yn cyflawni’r rôl Ymarferydd Presgripsiynu Dynodedig (DPP) wrth gyflwyno’r cais. 

Wrth gyflwyno’r cais, bydd rhaid cwblhau a chyflwyno ffurflen atodol sy'n benodol i'r cwrs Presgripsiynu Annibynnol. 

Noder hefyd:

• Bydd angen cyfrifiadur, cysylltiad rhyngrwyd a chyfrifiannell ar fyfyrwyr
• Gall cyflogwr y myfyriwr neu leoliad y dysgu ar sail ymarfer gynnal gwiriad cofnod troseddol yn unol â’u polisïau a’u gweithdrefnau eu hunain, er mwyn sicrhau bod y darpar presgripsiynwyr yn bodloni eu meini prawf – gan gynnwys gwiriad DBS Uwch. Bydd unrhyw gostau’n gysylltiedig â hyn yn gyfrifoldeb y cyflogwr neu’r darpar bresgripsiynwr.

Sut i wneud cais

Cysylltwch â Helen Charles (hsp23f@bangor.ac.uk) neu Ffion Simcox (f.simcox@bangor.ac.uk) i gael canllaw manwl ar sut i gwblhau'r cais llawn.

Gwnewch yn siŵr eich bod yn darllen ac yn dilyn y canllaw cais cam wrth gam gan y bydd hyn yn nodi pa adrannau o'r ffurflen gais sy'n orfodol ar gyfer y math o gwrs rydych am wneud cais amdano ac arbed amser i chi.

Paratowch y wybodaeth ganlynol (mewn dogfen Word):

• Manylion cyflogaeth cyfredol;
• Blynyddoedd o brofiad, a hanes cyflogaeth (lle bo hynny'n berthnasol)
• Enw'r aelod staff a'r sefydliad sydd wedi cymeradwyo eich cyllid ar gyfer y modiwl hwn.

Bydd hyn yn cyflymu'r broses o lenwi'r ffurflen gais.