ÌìÌì³Ô¹Ï

Rydym yn gartref i ymchwilwyr ac ymarferwyr angerddol sy'n arwain datblygiadau arloesol ym maes gwyddor chwaraeon ar hyn o bryd. Nid addysgu yn unig y mae ein staff yn ei wneud – maen nhw’n darganfod gwybodaeth newydd yn weithredol ac yn gweithio’n uniongyrchol gydag athletwyr a thimau o safon fyd-eang.

Enillodd 100% o'n hymchwil sgoriau o safon fyd-eang neu sgoriau sy’n cael eu cydnabod yn rhyngwladol yn Fframwaith Rhagoriaeth Ymchwil 2021, gan ein gosod yn 5ed yn y Deyrnas Unedig ar gyfer Gwyddor Chwaraeon. Mae hyn yn golygu y byddi di'n dysgu gan bobl sy'n arloesi ymchwil mewn labordai ac yn rhoi'r wybodaeth honno ar waith gyda pherfformwyr elît yn y maes.

Rydym yn dwyn ynghyd y gorau o'r ddau fyd – ymchwil arloesol ac ymarfer yn y byd go iawn. Byddi di’n cael mewnwelediadau sy'n pontio'r bwlch rhwng darganfyddiadau labordy a chwaraeon perfformiad uchel, gan roi'r darlun cyflawn i ti o'r hyn sy'n digwydd yn rheng flaen y maes.

Mae pob un o'n rhaglenni'n cynnwys cyfleoedd profiad gwaith go iawn – o leoliadau byr i flynyddoedd lleoliad llawn. Rydym eisoes yn gweithio gyda'r sefydliadau rwyt ti am ymuno â nhw.

Mae ein staff wedi meithrin partneriaethau cryf gydag UK Sport, Clwb Pêl-droed Manchester City, Clwb Pêl-droed Lerpwl, yr RAF, Bwrdd Criced Cymru a Lloegr, a'r Gwasanaeth Iechyd Gwladol. Nid cysylltiadau yn unig yw'r rhain – maent yn gydweithrediadau gweithredol sy'n agor drysau i ti.

Pan fyddi di'n barod ar gyfer dy leoliad, byddwn ni'n dy helpu i gamu i mewn i'r sefydliadau blaenllaw hyn. Ein cysylltiadau ni yw dy gyfleoedd di, gan roi profiad ymarferol i ti yn yr amgylcheddau lle mae gwyddor chwaraeon yn gwneud gwahaniaeth gwirioneddol.

O'th flwyddyn gyntaf, byddi di’n gweithio'n rheolaidd yn ein labordy addysgu gwerth £1 miliwn. Mae ein dosbarthiadau bach yn golygu dy fod di'n cael amser digonol gyda'r offer – dim gwylio o gefn yr ystafell.

Rydyn ni'n sicrhau dy fod di'n gadael yma'n hyderus ac yn fedrus gyda'r dechnoleg profi ddiweddaraf. Pan fyddi di'n camu i mewn i'th yrfa, byddi di eisoes yn gwybod sut i ddefnyddio'r offer sy'n bwysig. Dyna sy'n gwneud ein graddedigion yn wahanol.

Dydyn ni ddim yn gwahanu seicoleg, ffisioleg a symudiad dynol i mewn i focsus gwahanol – oherwydd nid dyna sut mae'r corff yn gweithio. O'r diwrnod cyntaf, byddi di'n dysgu sut mae'r meddwl a'r corff yn cysylltu, gan roi'r darlun cyflawn i ti.
Byddi'n cymryd modiwlau fel "Seicoffisioleg Chwaraeon ac Ymarfer Corff" a "Seicoffisioleg Gymhwysol: Sut i Fonitro a Gwella Perfformiad" sy'n dwyn ynghyd yr ymchwil ddiweddaraf ag ymarfer ymarferol. Byddi'n darganfod yn uniongyrchol sut mae'r hyn sy'n digwydd yn dy feddwl yn effeithio ar dy gorff, ac i'r gwrthwyneb.
Dyma'n union sut mae'r diwydiant yn symud. Meddylia am y ffrwydrad mewn apiau sy'n monitro straen, adferiad, a pharodrwydd yr ymennydd – maen nhw i gyd angen pobl sy'n deall y cysylltiadau hyn. Rydym dy baratoi i arwain mewn maes sy'n chwalu hen rwystrau ac yn creu posibiliadau newydd.

Nid dim ond dod o hyd i swyddi y mae ein graddedigion – maent yn llunio dyfodol gwyddor chwaraeon. Ydym, rydym yn dy baratoi'n wych ar gyfer llwybrau traddodiadol fel addysgu, hyfforddi a ffisiotherapi. Ond rydym hefyd yn creu'r genhedlaeth nesaf o ymchwilwyr ac ymarferwyr perfformiad uchel o safon fyd-eang.

Edrycha o gwmpas ein hadran – mae'r rhan fwyaf o'n darlithwyr a'n hathrawon presennol wedi graddio ym Mangor ac wedi dod yn ôl i arwain ymchwil sy’n torri tir newydd. Mae ein cyn-fyfyrwyr yn gweithio gyda thimau pêl-droed yr Uwch Gynghrair, sgwadiau criced rhyngwladol, cyrff llywodraethu chwaraeon, a'r Gwasanaeth Iechyd Gwladol. Nhw yw'r ymarferwyr cymhwysol sy'n gwneud gwahaniaethau go iawn ar y lefelau uchaf.

Dydyn ni ddim yn rhoi gradd i ti yn unig – rydyn ni'n dy gysylltu â rhwydwaith sy'n cwmpasu o chwaraeon elît i ymchwil arloesol. Gallai dy yrfa dy dywys i unrhyw le, ac rydym yma i'th helpu i gyrraedd yno.