ÌìÌì³Ô¹Ï

Ein rhaglen Bydwreigiaeth BA yw’r unig un yng Nghymru sydd wedi’i hachredu gan Fenter Babanod Gyfeillgar UNICEF. Mae hyn yn golygu bod eich addysg wedi’i seilio ar y dystiolaeth gryfaf ar gyfer cefnogi bwydo ar y fron a meithrin perthnasoedd clos rhwng rhieni a’u babanod – sgiliau a fydd yn diffinio eich ymarfer drwy gydol eich gyrfa.

Mae ein rhaglen bydwreigiaeth wedi’i llunio gan ymchwil arloesol i’r hyn sy’n wirioneddol bwysig – o enedigaethau gartref ac ymgysylltiad tadau i gefnogi goroeswyr trais rhywiol a deall effaith yr iaith Gymraeg ar brofiadau geni. Byddwch yn dysgu gan ymarferwyr profiadol y mae eu hymchwil nid yn unig yn llenwi cyfnodolion, ond sy’n trawsnewid yr hyn sy’n digwydd yn yr ystafell ddosbarth ac ar y ward enedigaeth.

Mae hanner eich dysgu yn digwydd mewn lleoliadau clinigol ochr yn ochr â’n partneriaid yn GIG Cymru. Trwy leoliadau goruchwyliedig mewn amgylcheddau modern a chyfarpar da ledled Gogledd Cymru, byddwch yn datblygu’r hyder a’r cymhwysedd i ddarparu gofal diogel, sy’n canolbwyntio ar y fenyw o’r diwrnod cyntaf, gyda chyfleoedd i ymarfer yn ddwyieithog ac i gymryd rhan mewn lleoliad dewisol i ehangu eich profiad.

O’r eiliad y byddwch yn cyrraedd, byddwch yn teimlo cynhesrwydd ein cymuned gefnogol. Rydym ni’n Fangoriaid – rydym yn gofalu am ein gilydd. Gyda chohortau bach, cefnogaeth bwrpasol a staff sy’n adnabod eich enw, byddwch yn rhan o brifysgol lle mae pob llais yn cael ei werthfawrogi a phob myfyriwr yn cael ei gefnogi wrth i chi lywio heriau a gwobrau addysg bydwreigiaeth.

Fel myfyriwr bydwreigiaeth yng Nghymru, byddwch yn gymwys i gael Buddsoddiad GIG Cymru, sy’n talu eich ffioedd dysgu ac yn rhoi cymorth ariannol tuag at gostau byw drwy gydol eich astudiaethau. Mae hyn yn golygu y gallwch ganolbwyntio'n llwyr ar eich dysgu a'ch ymarfer clinigol, heb y baich ariannol sy’n wynebu myfyrwyr mewn rhannau eraill o’r DU.